Nagmalampuson ang kamagulangang anak ni boxing legend Manny Pacquiao nga si Jimuel Pacquiao sa iyang pagsulod sa kalibutan sa professional boxing human niya gipatomba ang iyang kaatbang karung adlawa.
Gipakita ni Jimuel ang iyang kahanas sa sulod sa ring human niya ma-knockout (KO) ang iyang kontra sa ikaduhang round pa lang sa ilang engkwentro. Mao kini ang nagsilbing labing unang kadaugan ni Jimuel isip usa ka professional boxer, butang nga nakahatag og garbo sa iyang pamilya ug sa mga Pinoy boxing fans.
Sumala sa mga report, agresibo ang gipakitang dula ni Jimuel sukad pa sa unang round, diin iyang gipaulanan og mga kumo ang iyang kaatbang hangtod nga wala na kini makabangon sa 2nd round.
Daghan ang nag-ingon nga makita sa lihok ni Jimuel ang istilo sa iyang amahan nga si “Pacman,” apan gipahayag sa batan-ong Pacquiao nga gusto niya nga makahimo og kaugalingong ngalan sa maong isports. Sa pagkakaron, gipaabot nga mas pahingusgan pa ni Jimuel ang iyang training alang sa iyang mga sunod nga sangka sa ring.