Mibahad ang nasod sa Israel nga andam silang mogamit sa tanang kusog o “full force” batok sa Lebanon kon mabutang sa kakuyaw ang ilang mga sundalo, luyo sa nagpadayon nga ceasefire.
Sumala sa mga taho, gimandoan ni Prime Minister Benjamin Netanyahu ang ilang militar (IDF) nga molihok sa tibuok pwersa—sa yuta man o sa hangin—aron panalipdan ang ilang mga tropa batok sa bisan unsang hulga gikan sa grupong Hezbollah o uban pang armadong grupo sa Lebanon.
Kini nga pamahayag migawas human mapatay sa mga sundalo sa Israel ang usa ka giingong “terorista” nga nilapas sa mga sabot-sabot sa ceasefire pinaagi sa pagtabok sa Forward Defense Line.
Giklaro sa Israel nga bisan pa man kon epektibo na ang 10-adlaw nga ceasefire nga giduso sa Estados Unidos, dili sila magpanuko sa pag-atake alang sa ilang kaugalingon nga depensa o self-defense. Sa pagkakaron, nagpabilin ang tensyon sa utlanan samtang gisulayan sa nagkalain-laing nasod nga mapalungtad ang maong tigil-putukan alang sa mas permanente nga kalinaw sa rehiyon.