Kapunan, gihagit si VP Sara nga tubagon ang mga alegasyon sa hustong forum

Gihagit ni Atty. Lorna Kapunan si Vice President Sara Duterte nga tubagon sa impeachment court ang mga alegasyon kalabot sa iyang mga galastohan ug sa iyang opisina, imbes nga magpahigayon og mga press conference.

Matud ni Kapunan, posibleng taktika lamang ang mga press conference aron mabalhin ang atensiyon sa publiko gikan sa mga isyu nga giatubang ni Duterte.

Giklaro usab ni Kapunan nga wala sila magplano nga ipatawag ang bise presidente isip ilang saksi kay giisip niyang pag-usik lamang kini sa panahon.

Bisan pa niini, miingon si Kapunan nga andam siyang boluntaryong mo-cross-examine kang Duterte kon ipresentar kini sa depensa isip saksi sa impeachment proceedings.