Gikondena sa National Commission on Indigenous Peoples (NCIP) Bukidnon ang kontrobersyal nga paggamit sa sagradong accessories sa mga Lumad isip dekorasyon sa litson atol sa Lechon Festival sa Kaamulan niadtong Abril 16.
Sa pakighinabi sa Bombo Radyo Malaybalay, gibutyag ni Ronaldo Baya-on Provincial Officer sa NCIP-Bukidnon, nga matod pa walay nahitabong koordinasyon tali sa mga organizers ug sa ilang ahensya o sa liderato sa pito ka tribo kabahin sa maong kalihukan. Nadiskubre lamang sa NCIP ang maong insidente pinaagi sa mga post sa social media diin giisip nila kini nga usa ka dakong insulto ug pagpanamastamas sa dignidad sa mga lumad dinhi sa Bukidnon.
Gipasabot sa opisyal nga ang maong mga accessories nagrepresentar sa identidad ug balaang kultura sa mga tribo, busa dili kini angay nga ipangtaod sa usa ka hayop. Subay niini, nagkonsulta na karon ang NCIP sa ilang legal team alang sa posibleng lakang batok sa mga organizers ug partisipante, dungan sa pagpahigayon og Information and Education Campaign (IEC).
Kahinumduman nga giklaro karon ni Jun Cruz, ang Provincial Chair for the Events Committee, mahitungod sa maong kontrobersiyal nga Lechon Festival sa maong Kaamulan 2026, nga matod pa ang maong aktibidad gidumala sa Agriculture Office kauban ang mga partisipanteng Local Government Units (LGUs) sa lalawigan.
Nagpabilin ang hugot nga panawagan sa pito ka tribo sa lalawigan alang sa saktong respeto ug panalipod sa ilang sagradong kabilin aron malikayan ang susamang pagpanamastamas sa umaabot.