Nepal, subling giigo sa flash flood; kapin 40 ka balay naanod!

Subling giigo sa kusog nga flash flood ang Nepal diin gitahong naanod ang kapin 40 ka balay, samtang gipabakwit ang mga residente sa pipila  nga baryo duol sa Budhi Gandaki River tungod sa hulga sa dugang pagbaha. Base sa inisyal nga mga taho, gibanabana nga 35 hangtod 45 ka balay ang naapektuhan sa Chumnubri ug Dharche rural municipalities human kalit nga misaka ang tubig sa suba nga gituohang may kalabotan sa pagdahili sa yuta sa kabukiran. Gikataho usab nga nangadaot ang pipila ka tulay, samtang nagpadayon ang rescue ug evacuation operations sa mga lokal nga awtoridad ug militar gamit ang mga helicopter ug loudspeaker aron mapahawa ang mga residente sa peligroso nga mga lugar. Samtang, padayon pang gipangita ang labing menos lima ka indibidwal nga gitahong nawala atol sa kalamidad. Sa pagkakaron, nagpadayon ang pagtimbang-timbang sa mga awtoridad sa kinatibuk-ang kadaot nga gipahinabo sa pagbaha.