Nagtuo si Bukidnon Rep. Jonathan Keith Flores nga ang dili pagtambong sa pagdungog sa House Committee on Justice bisan gihatagan na og higayon, mahimong isipon nga pagbalewala o “waiver” sa katungod sa pagtubag sa mga alegasyon sa impeachment.
Kini may kalabutan sa isyu sa due process sa impeachment proceedings batok kang Vice President Sara Duterte.
Matud sa mambabalaod, ang sensya sa due process mao ang paghatag og kahigayonan nga madungog ang usa ka panig (opportunity to be heard), ug dili kini magdepende kung gamiton ba o dili sa respondent.
Gipasabot usab ni Flores nga ang pag-isyu og subpoena dili aron pugson ang kampo sa Bise Presidente, kondili aron makakuha og importanteng impormasyon gikan sa mga indibidwal nga makatabang sa kaso.
Lakip sa gipadalhan og subpoena mao si Atty. Michael Poa ug pipila ka mga opisyal gikan sa Commission on Audit (COA), human gisugyot sa mga miyembro sa komite diin lakip si Congressman Antonio Tinio nga kinahanglan ang ilang testimonya alang sa padayon nga pagsusi sa reklamo.
Bisan pa niini, nagpadayon sa pagkwestiyon ang kampo ni Duterte sa legalidad sa proseso gawas sa komite, samtang gipili nga wala mitambong sa mga miaging pagdungog.