Namatay ang 78-anyos nga si Teresa “Beth” Fernandez, igsuon sa iladong action star nga si Rudy Fernandez, sa usa ka sunog nga natiaon sulod sa ilang panimalay sa Scout Rallos Street, Barangay Kamuning, Quezon City niadtong Miyerkules, Agosto 6.
Napakyas matud pa makagawas sa balay ang igsuon sa aktor gumikan bedridden na kini, hinungdan nga wala siya maluwas sa kalayo nga misaka pa sa second alarm ug nadugayan og kapin usa ka oras una napalong.
Gipahibalo sa iyang pag-umangkon nga si Rap Fernandez ang maong trahedya pinaagi sa social media, diin iyang gipadayag ang kasubo sa pagkamatay sa iyang iyaan nga Beth.
Sa laing post, gisaysay sa anak ni Beth nga si Joanna Fernandez Velayo nga nasunog ang tibuok balay ug wala nay panahon nga maluwas pa ang iyang inahan.
Gilauman nga magpagawas sila og dugangng detalye bahin sa haya sa mga musunod nga mga adlaw.