Hugot nga gipahimangnoan sa Department of Labor and Employment (DOLE) ang mga pribadong kompanya sa probinsya sa Bukidnon, ilabi na kadtong adunay kapin sa napulo (10) ka mga trabahante, nga mosunod sa gipatuman nga ₱14.00 nga usbaw sa minimum wage.
Matud ni Reyna L. Tagailo, ang Senior Labor and Employment Officer sa DOLE-Bukidnon Provincial Field Office, kinahanglan nga ipahiuyon sa mga tagdumala sa kompanya ang ilang pagpasuweldo base sa bag-ong Wage Order.
Dugang pa niini, giklaro nga ang maong usbaw sa suholan niagi sa mabinantayong wage hearing diin aktibong nisalmot ang habig sa management ug mga trabahante aron makab-ot ang makiangayong kasabutan.
Gipahibalo usab nga aduna pay umaabot nga mga susamang dayalogo aron padayong matuki ang kahimtang sa suholan base sa panginahanglan sa matag sektor sa probinsya.
Gipadayag usab niini nga adunay gipahigayon nga wage meeting sa dili pa ang pag-apruba sa maong wage order. Tungod niini, nasayod na ang kadaghanan sa mga kompanya sa probinsya sa Bukidnon mahitungod sa maong kausaban. Samtang, gipaklaro nga ang Department of Labor and Employment (DOLE) nagahimo og regular inspection pinaagi sa mga labor inspectors. Kini aron masiguro ug masuta kon hugot ba gayod nga napatuman ang pagpasaka sa minimum wage rate sa tibuok probinsya.