Nag-atubang sa kalisod ang Independent Commission for Infrastructure (ICI) sa pagkonekta sa mga kanhi opisyal sa Department of Public Works and Highways (DPWH) ngadto sa mga giingong “dagkong isda” nga nalambigit sa maanomalyang flood control projects.
Matod ni ICI Chairman Ret. Supreme Court Justice Andres Reyes Jr., kinahanglan pa nga mapamatudan na klaro ang ebidensya sa dili pa konektahon ang mga DPWH personnel nga mitug-an nga nalambigit sa maong iskema ngadto sa mga taas nga opisyal sa gobyerno.
Gihangyo ni Reyes ang mga posibleng whistleblowers nga motabang sa pagtapok sa dugang ebidensya. Gipasabot niini nga bisan pa adunay klarong koneksyon tali sa mga DPWH officials ug ubang opisyal sa gobyerno, wala pa kini mapaimbestigahan.
Gidugang pa niini nga nanginahanglan ang ICI og dugang testimonya gikan sa mga tawo nga adunay kahibalo sa operasyon, tungod kay mastermind ug planado ang lihok sa mga nalambigit aron malikayan ang ma-record nga ebidensya.