Gipanghimakak nila Rep. Paolo Ortega V ug Rep. Janette Garin ang mga alegasyon nga adunay suhol o pagpamugos sa botohan sa House Committee on Justice nga nagdeklara og probable cause batok kang Bise Presidente Sara Duterte.
Sumala kang Ortega, “walay basehan” ang sumbong nga adunay P1.3-bilyon nga giingong “appearance fee,” ug gipasiugda niya nga ang unanimous nga 53-0 nga boto nakabase sa mga dokumento, testimonya, ug financial records.
Ang maong pagdungog gipangulohan ni House Committee Chair Rep. Gerville Luistro diin nagkahiusa ang panel niadtong Abril 29 sa ilang desisyon.
Sa laing bahin, giingon ni Garin nga “walay kamatuoran” ang mga alegasyon sa bribery ug coercion, ug iyang gipunto nga lig-on ang ebidensya nga gipresentar batok sa Bise Presidente, apan wala kini matubag tungod kay wala siya mitambong sa mga hearing.
Matud sa duha ka lider nga ang maong mga akusasyon usa lamang ka diversion ug pagpangdaot sa proseso, ug ilang gihagit ang kampo ni VP Duterte nga tubagon ang mga isyu sa husto nga constitutional forum ilalom sa impeachment proceedings.