Andam ang Hamas nga motubag sa panawagan ni Israeli Prime Minister Benjamin Netanyahu sa Red Cross nga pasudlon ang mga tambal ug pagkaon alang sa mga bihag nga anaa sa Gaza.
Matud sa opisyal sa Hamas, mahimo lamang kini matuman sa higayun nga ablihan na ang Gaza Strip ug molikay na ang mga puwersa sa Israel.
Gitawagan na ni Israeli President Isaac Herzog ang Presidente sa International Committee of the Red Cross nga si Mirjana Spoljaric, diin iyang gihatagan og gibug-aton nga kinahanglan na silang molihok alang sa mga bihag.
Gibanabana nga naa pa sa 49 ka mga bihag ang gihuptan sa Hamas.
Gisiguro usab sa Hamas nga andam silang makigtambayayong sa Red Cross sa pagdala og pagkaon ug tambal alang sa mga bihag, og tumanon ang kondisyon nga ablihan ang humanitarian corridors.