Nipasidaan ang nasud sa Iran og usa ka malungtaron ug mas bug-at nga balos batok sa Estados Unidos kon ugaling mopahigayon pag-usab og mga pag-atake sa militar ang Washington, dungan sa nagpadayong tensyon sa rehiyon.
Kini human sa duha na ka bulan ang milabay sukad sa pagulbo sa giyera nga naglambigit sa nasud sa U.S., Israel, ug Iran.
Gumikan niini, nagpabiling sirado ang Strait of Hormuz nga usa ka kritikal nga agianan sa dul-an 20% sa tibuok kalibutan nga suplay sa lana ug gas diinmaoy hinungdan sa grabeng pagsaka ug pag-usab-usab sa presyo sa lana sa merkado bisan pa man sa naglungtad nga ceasefire sukad niadtong Abril 8.
Samtang padayong giharangan sa Iran ang maong agianan isip tubag sa “naval blockade” sa U.S. sa ilang pag-eksport og lana, gikatakda usab nga tagaan og briefing si U.S. President Donald Trump kalabot sa posibleng bag-ong serye sa pag-atake sa militar aron pugson ang Iran nga makig-negosasyon bahin sa nuclear issues.