Gibatikos sa mga ekonomista ug legal nga eksperto ang State Of the Nation Adress (SONA) ni Presidente Ferdinand Marcos Jr. kagahapon adlawa, tungod sa kakuwang sa pondo nga mosuporta sa iyang mga gipangbutyag.
Sa pakighinabi sa Bombo Radyo Malaybalay ngadto kang Ray Talimio Jr. sa Regional Development Council X, matod pa niini dili tin-aw kung asa kuhaon ang pondo alang sa libr eng plete, tambal, ug tabang sa agrikultura, samtang ang PhilHealth gani nag-atubang og zero budget.
Gibutyag usab ni Talimio nga wala gihisgutan ang preparasyon sa gobyerno kon aduna may umaabot nga katalagman, ug giilarawan ang tibuok pamahayag nga “lip service” lamang aron ipakalma ang katawhan.
Sa laing pakighinabi usab ngadto kang Atty. Oscar S. Moreno, usa ka propesor sa balaod ug corporate lawyer, mitumbok kini nga bisan aduna may direksyon ang plano sa presidente, kulang kini sa tin-aw nga flagship program o long-term nga panan-aw nga magbilin og legasiya.
Matod niini, ang SONA usa kini ka motivational speech, ug ang responsibilidad sa pagtuman niini naa gihapon sa mga lokal nga kagamhanan ug mga ahensya sa nasyonal nga gobyerno.
Gilauman sa publiko ug mga lider nga ipakita dayon sa administrasyon ang klarong plano ug lakang human sa pamahayag sa SONA.