Mukabat sa 325 ka tawo ang gidakop sa kapulisan sa London human misalmot sa demonstrasyon isip suporta sa Palestine Action, usa ka grupong gidili ubos sa balaod kontra terorismo sa United Kingdom.
Nahitabo ang ang protesta niadtong Sabado sa gawas sa United States Embassy sa Nine Elms, diin nagtigom ang gatusan ka demonstrador nga nagdalag mga plakard isip pagpahayag sa suporta sa Palestine Action ug pagsupak sa giingong genocide sa Palestine.
Matud sa Metropolitan Police, 320 sa mga gidakop ang gidudahang nakalapas sa Terrorism Act tungod sa pagpahayag og suporta sa usa ka gidili nga organisasyon.
Tungod niini, milapas na sa 4,000 ang kinatibuk-ang gidaghanon sa mga gidakop nga may kalabotan sa Palestine Action sukad gidili ang maong grupo niadtong Hulyo 2025.
Samtang, gikatakdang paminawon sa UK Supreme Court ang apela batok sa pagdili sa grupo.
Gikondena usab sa pipila ka organisasyon sa katungod sa tawo ang maong mga pagdakop ug gipasiugda ang pagpanalipod sa kagawasan sa pagpahayag ug katungod sa pagpahigayon og protesta.