Gipahimangnoan ni Presidente Ferdinand R. Marcos Jr. ang Department of Public Works and Highways (DPWH) nga pauboson ang gasto sa mga materyales sa konstruksyon hangtod 50 porsyento. Ang maong lakang gilauman nga makatigom og P30 hangtod P45 bilyon nga ipangapod-apod sa sektor sa panglawas, edukasyon, ug pagkaon.
Matod ni Marcos, nakita sa DPWH nga sobra ka mahal ang presyo sa pipila ka materyales sama sa asphalt, steel bars, ug semento nga misaka hangtod 50 porsyento. Tungod niini, gimandoan niini ang DPWH Secretary nga ipahimutang ang presyo base sa aktuwal nga market value aron masiguro nga husto ang paggasto sa kuwarta sa katawhan.
Sa laing bahin, gibutyag ni Presidente Marcos nga padayon ang paningkamot sa gobyerno nga mapamubo ang presyo sa mga palaliton, ilabi na sa pagkaon. Gipasiugda niini nga hugot nga ginabantayan ang pagpatuman sa suggested retail price sa imported rice ug sa P20 kada kilo nga programa aron mapadayon ang abot-kayang bugas para sa tanan