Mas kusog ang mga Ballistic missile nga gikan sa Iran sa nagpadayon nga pag-atake sa Israel. Rason sa kabalakang gibati sa matag adlaw sa mga Pilipino nga anaa sa Ashkelon City sa kasadpang bahin sa Israel.
Sa eksklusibong pakighinabi sa Bombo Radyo Malaybalay Bukidnon kang Maribel Comiling, Bombo International Correspondent sa Israel, ang kasamtangang mga ballistic missile nga gipagawas sa Iran padulong sa Israel mas kusog ug mas daghan kung ikumpara sa miaging mga adlaw .Ang mga missile nga gipagawas sa Iran nagsugod sa pag-atake sa mga target sa Israel gikan alas 10:00 sa gabii hangtod alas 1:00 sa kaadlawon.
Ang mga atake naglakip sa paggamit sa mga hypersonic nga missile ug drone swarms.Ang mga syudad sama sa Tel Aviv ug Haifa naapektohan sa mga pag-atake, nga nagmugna og dakong kadaut sa imprastruktura ug mga balay.
Sumala ni Comiling, usa sa mga kauban nga Overseas Filipino Workers nga nagpuyo sa Tel Aviv ang naapektohan sa pag-atake. Ang iyang balay naigo sa usa ka missile, nga nagresulta sa samad sa iyang lawas. Kini nagpakita sa seryosong epekto sa mga pag-atake sa mga sibilyan. Samtang gi awhag usab ni Comiling publiko nga magbantay sa mga balita nga makita sa social media, tungod kay daghan sa mga impormasyon ang dili tinuod. Gisugyot niya nga ang tanan nga impormasyon kinahanglan biripikahon una pa kini tuohan aron malikayan ang fake news.