Nakigbatok ang mga forest firefighters sa City ENRO kauban ang mga boluntaryo sa nagpadayong wildfire sa Mt. Kiamo area, sakop sa Barangay Kibalabag, Malaybalay City.
Sumala sa taho, niadtong milabayng adlaw pa nagsugod ang operasyon diin nagtinabangay ang Bravo 1, Team Can-ayan, Team Manalog, Team Kibalabag, ug mga Civilian Volunteers aron mapugngan ang pagkaylap sa kalayo.
Ang maong sunog giingong nagsugod tungod sa wala makontrolar nga pagsunog sa umahan alang unta sa expansion sa pananom, apan daling nikatap padulong sa bukid.
Bisan pa man sa grabeng kakapoy ug kadelikado sa sitwasyon, gipasalig sa mga responders nga padayon silang maningkamot aron mapanalipdan ang kalasangan sa siyudad.
Nanawagan usab ang mga nahisgutan og pag-ampo alang sa ilang kaluwasan samtang anaa pa sila sa ground nakigbisog sa maong katalagman.