Nitubag na si Senador Francis “Chiz” Escudero sa mga alegasyon nga naglambigit kaniya sa usa ka anomalya o kickback scheme sa mga flood control project.
Gihimo sa senador ang iyang pagpatubag pinaagi sa pagsumite og usa ka counter-affidavit (ngadto sa Office of the Ombudsman. Una nang gipahayag sa Ombudsman nga ang mga reklamo nga plunder ug graft batok sa senador gipailawom na sa preliminary investigation. Matod ni Assistant Ombudsman Mico Clavano, mag-agad sa makikta nga resulta sa imbestigasyon kon ibasura ba ang reklamo o idayon ang pagpasaka og kaso batok kaniya ngadto sa Sandiganbayan.
Kahinumduman nga nalambigit ang pangalan ni Escudero sa maong kontrobersyal nga iskandalo human gibutyag ni kanhi DPWH Undersecretary Roberto Bernardo sa usa ka Senate hearing nga duna matod pa’y 20% nga commitment fee ang senador gikan sa nagkalain-laing proyekto sa nasod. HUgot usab nga gipanghimakak ni Escudero ang maong mga pasangil, ug iyang gipasabot nga kabahin lamang kini sa usa ka demolition job o tinguha sa pagguba sa iyang dungog.