Gibutyag ni Senador Imee Marcos nga lisod isipon nga dili sa politika ang timing sa pagsang-at sa mga kaso batok sa pipila ka miyembro sa Senate majority bloc, lakip nini sila Senador Jinggoy Estrada, nga karon giatubang ang kasong plunder may kalabotan sa giingong flood control scandal.
Matud sa senadora, daghan ang nangutana nganong sunod-sunod ang legal nga aksyon samtang padayon usab nga gikontra sa minority bloc ang sugyot nga motugot sa online participation o remote voting sa Senado.
Sumala ni Marcos nga importante nga makadungog sa tingog sa tanang piniling senador ilabi na karon nga adunay sensitibong mga isyu nga giatubang sa Senado sama sa impeachment proceedings ug uban pang nasudnong kontrobersiya.
Gipahinumdoman usab niini nga kaniadto, adunay mga senador gikan sa minority nga misuporta usab sa remote participation atol sa panahon nga adunay mga senador nga napriso o nag-atubang nga kaso.
Samtang, nagpasabot si Senador Panfilo “Ping” Lacson ug giingong mahimo man nga usbon ang Senate rules apan kinahanglan kini agion sa hustong proseso ug dili pagadali-dalion.
Dugang niini, posible nga makatambong sa impeachment trial ang mga senator-judges bisan pa man kon adunay kaso pinaagi sa pagtugot sa korte ug ilawom sa pagbantay sa BJMP.
Gipasabot usab ni Lacson nga dili mahimong “work from jail” ang estilo sa serbisyo sa Senado.