Gibatikos sa usa ka eksperto sa ekonomiya ang pagdumala sa gobyerno tungod sa giingong pagpabor sa politikanhong interes ug gikaingong anomaliya sa paggasto, ilabina sa mga proyekto sa flood control.
Sa pakighinabi sa Bombo radyo Malaybalay Mr. Ray Talimio Jr., kanhi miyembro sa Economic Development RDC-X, giingon sa kritiko nga imbes unahon ang kalamboan sa nasud, adunay mga lider nga nakapokus sa ilang kaugalingong politikanhong interes para sa 2028 elections.
Matud pa niini, nakaapekto kini sa paghatag sa batakang serbisyo ug sa pagpatuman sa mga programa sa gobyerno.
Dugang pa ni Talimio, nga dako ang epekto sa publiko sa nagpadayong mga kausaban ug kalisud sa sistema. Gipatin-aw niya nga apektado kaayo ang paghatag sa mga pundamental nga serbisyo (basic services) tungod kay dili na gani makab-ot ang mga gipanglantawang kalamboan ug projections.
Gibatikos usab niini ug gipadayag nga gikan sa maayong estado sa ekonomiya nga napanunod sa miaging administrasyon, naguba ug mikunhod kini sa halos tanang aspeto.
Gitudlo niini ang pipila ka mga nag-unang suliran nga giatubang karon sa nasud nga nakahatag og tumang kabalaka sa mga ekonomista.