Gibana-banang kapin sa 200 ka tawo ang namatay human gituohang naigo sa airstrike sa militar ang usa ka merkado sa amihanang-sidlakang bahin sa Nigeria sa milabay’ng adlaw, sumala sa mga lokal nga opisyal ug mga residente.
Nasayran nga nagpadayon ang operasyon sa militar batok sa mga Islamist militant sa rehiyon sa dihang nahitabo ang insidente sa Jilli Market nga nahimutang sa utlanan sa Yobe ug Borno states, usa ka lugar nga dugay nang apektado sa insurgency nga hinungdan sa libo-libong kamatayon ug pagbalhin sa milyon-milyong residente.
Matud sa us ka lokal nga opisyal nga daghan sa mga biktima gidala sa mga ospital sa Yobe ug Borno, samtang gipamatud-an usab sa ubang residente ug usa ka humanitarian worker ang dako nga kadaot nga nahitabo.
Sumala sa usa ka nakaluwas, nakahatag og dakong kahadlok ang pagbusikad diin daghang tawo ang misulay og ikyas apan naglisod tungod sa kalit nga pag-atake.
Sa laing pahayag, sumala sa Nigerian Air Force nga nakapatay sila og mga miyembro sa Boko Haram sa ilang operasyon sa Jilli axis, apan wala niini gihisgoti ang giingong pag-atake sa merkado.
Padayon pang giimbestigahan sa mga otoridad ang eksaktong gidaghanon sa mga namatay ug ang tibuok kadaot nga nahitabo sa insidente.