Nagpadangat og kabalaka ang sektor sa transportasyon, partikular na ang mga drayber sa Northern Mindanao, tungod sa nalangay nga pag-apod-apod sa mga ayuda gikan sa gobyerno.
Sumala ni Joel Gabatan, ang Regional Coordinator sa National Confederation of Transportation Unit (NCTU), hangtod karon daghan pa gihapon nga mga drayber ang wala makadawat sa gisaad nga fuel subsidy ug uban pang tabang pinansyal.
Bisan pa man sa mga gihimong panagtigom uban sa mga opisyal sa LTFRB, puro ra matud pa pasalig ang ilang nadawat apan wala pa’y konkretong aksyon.
Gikabalak-an usab niini ang posibleng epekto sa giduso nga petisyon alang sa umento sa pletehan ug ang pagpagawas sa mga ayuda kon duna may mahitabong “roll back” o pag-ubos sa presyo sa lana sa mosunod nga mga semana.
Sumala sa Regional Coordinator sa NCTU, nagpaabot pa sila sa mamahimong dagan sa presyo sa petrolyo aron masuta kon madayon ba ang ilang pagduso sa petisyon.
Giklaro usab niini nga gikinahanglan gihapon ang mga programa sa ayuda bisan pa man kon adunay pag-ubos sa presyo sa lana aron makatabang sa mga drayber nga naglisod pa tungod sa nangaging mga pagsaka sa presyo.