Nakatingkagol na karon sa selda sa kapulisan ang giilang Top 5 Most Wanted Person sa provincial level ug Top 1 sa municipal level human kini malampusong nadakpan sa gipahigayon nga operasyon batok ilegal nga droga kaganihang buntag, Abril 23.
Giila sa mga otoridad ang dinakpan nga si Salahudin Guiabal y Mamalantong, 32-anyos, usa ka mag-uuma ug residente sa Barangay Tangkulan sa maong lungsod. Gihimo ang pagpangronda sa mga personahe sa Damulog Municipal Police Station sa Purok 9, Barangay Poblacion, pasado alas 8:10 sa buntag.
Gisikop ang suspek pinaagi sa gahom sa Warrant of Arrest tungod sa paglapas sa Comprehensive Dangerous Drugs Act of 2002. Subay sa kamanduan sa korte, walay piyansa nga gitakda alang sa iyang temporaryong kagawasan. Sa pagkakaron, ang dinakpan anaa na sa kustodiya sa kapulisan alang sa dokumentasyon ug saktong disposasyon sa iyang kaso.