Nagtingkagol na karon sa selda sa kapulisan ang usa ka 48-anyos nga babaye human kini malampusong nadakpan sa gipahigayon nga drug buy-bust operation sa Purok 10, Barangay Casisang, kaganihang buntag.
Giila sa mga otoridad ang suspek nga usa ka street-level individual. Sa gihimong operasyon sa kapulisan pasado alas 11:48 sa buntag, narekober gikan sa iyang posisyon ang upat ka pakete sa gituohang shabu nga motimbang og kapin tulo ka gramos. Gibanabana nga ang maong ilegal nga droga adunay standard drug price nga muabot sa ₱20,903.
Gawas sa gituohang shabu, nasakmit usab sa mga otoridad ang gigamit nga buy-bust money, usa ka coin purse, ug ang motorsiklo nga gipanag-iyahan sa suspek. Sa pagkakaron, gipasakaan na og kasong paglapas sa Republic Act 9165 o Comprehensive Dangerous Drugs Act of 2002 ang maong dinakpan samtang gihikay na ang mga dokumento alang sa disposasyon sa iyang kaso.