Sikop sa mga otoridad ang duha ka lalaki human masakpan nga nagdala og ilegal nga armas sa Purok 4, Barangay Lilingayon, Valencia City, niadtong Mayo 2, alas 11:30 sa gabii.
Base sa otoridad miresponde ang mga operatiba sa Valencia City Police Station human makadawat og tawag kalabot sa usa ka komosyon. Nasayran nga ang maong panagbangi naglambigit sa duha ka trabahante nga giingong nasuko sa ilang agalon tungod sa pasangil nga gipangawat niini ang ilang binaligya nga kanding.
Tungod sa kahadlok, daling nangayo og tabang sa pulisya ang biktima. Sa gihimong hot pursuit, narekober gikan sa posisyon sa mga suspek ang usa ka shotgun ug usa ka .38 revolver nga pulos adunay mga buhing bala. Sa pagkakaron, ang mga dinakpan anaa na sa kustodiya sa kapulisan alang sa pagpasaka og tukmang kaso.