Duha ka lalaki ang nadakpan sa managlahing buy-bust operation sa kapolisan sa mga lungsod sa Kalilangan ug Pangantucan, Bukidnon.
Nadakpan ang 40-anyos nga lalaki sa Purok 2, Central Poblacion, Kalilangan, alas 10:55 sa gabii, diin nasakmit gikan kaniya ang 4.5 gramos sa gituohang shabu nga nagkantidad og ₱27,540.
Samtang, nadakpan usab ang 37-anyos nga suspek nga giila lamang sa alyas Dexter sa Purok 6, Barangay Pigtauranan, Pangantucan, alas 8:25 sa gabii.
Nasakmit gikan kaniya ang 5.2 gramos sa gituohang shabu nga nagkantidad og ₱35,360.
Gidala sa Bukidnon Provincial Forensic Unit ang mga nasakmit nga ilegal nga droga alang sa eksaminasyon, samtang anaa na sa kustodiya sa tagsa-tagsa nilang municipal police station ang duha ka dinakpan ug giandam ang pagpasaka og mga kaso batok kanila.

