Nagsul-ob og parehas nga sinina sa sikat nga boksidor nga si Rocky Balboa ang 570 ka fans sa pelikulang Rocky nga nagtigom sa hagdanan sa Philadelphia Museum of Art sa Philadelphia, Estados Unidos, niadtong Nobyembre 13.
Nagsul-ob ang mga partisipante og abuhong tracksuit, itom nga bonnet ug itom nga taas nga sapatos, sama sa gisul-ob sa karakter ni Sylvester Stallone sa maong pelikula.
Tungod niini, nakab-ot nila ang Guinness World Record alang sa kinadak-ang panagtigom sa mga tawo nga nagsul-ob isip si Rocky Balboa.
Nahimong espesyal usab ang kalihokan tungod kay kabahin kini sa pagsaulog sa ika-50 nga anibersaryo sa pelikulang Rocky nga unang gipasalida niadtong 1976.
Adunay mga fans nga mibyahe pa gikan sa Germany, England ug Hungary aron makaapil, lakip ang pipila nga naghulat bisan pa sa ulan.
Human mapamatud-an ang rekord, dungan nga misaka sa bantugang hagdanan ang mga partisipante samtang nagsinggit og “Rocky! Rocky! Rocky!”

