Gipahibalo sa Palasyo sa Malacañang ang pagdeklarar sa 10 ka bag-ong National Artists o Pambansang Alagad sa Sining sa Pilipinas pinaagi sa Proclamation No. 1414 nga gilagdaan ni Presidente Ferdinand Marcos Jr.
Ang mga bag-ong giila mao sila si Nicanor Tiongson ug Gregorio Brillantes (Panitikan); Imelda Cajipe Endaya ug Nunelucio Alvarado (Visual Arts); Gabriel Formoso (Arkitektura); Rafael “Nonoy” Froilan (Sayaw); Maria Beatriz “Patis” Tesoro (Disenyo); Armando “Bing” Lao (Pelikula ug Broadcast Arts); Teodoro Hilado (Teatro); ug Alfredo S. Buenaventura (Musika). Gihatagan pinaagi sa posthumous award ang maong pag-ila alang kang Formoso, Brillantes, Lao, ug Hilado.
Ang Order of National Artists mao ang labing taas nga nasyonal nga pag-ila alang sa mga Pilipino nga nakahatag og dako ug makabuluhang tampo sa pagpalambo sa kultura ug arte sa nasod, subay sa rekomendasyon sa Cultural Center of the Philippines (CCP) ug National Commission for Culture and the Arts (NCCA). Makadawat ang mga awardees og Grand Collar, medalya gikan sa Bangko Sentral ng Pilipinas, state funeral, ingon man mga insentibong pinansyal alang sa mga buhi pa nga nakadawat.