Nagpabilin karon sa prisohan ang usa ka driver-volunteer sa National Bureau of Investigation o NBI nga giakusahan nga maoy nagsugod sa nahitabong pagpamusil sulod sa Senado niadtong Miyerkules, Mayo 13.
Pormal nang gikasuhan sa Pasay City Prosecutor’s Office ang maong indibidwal nga giila lamang sa alyas nga Mel Oragon, 44 anyos.
Lakip sa giatubang niini nga mga kaso ang lima ka paglapas sa Revised Penal Code sama sa alarm and scandal, tumultuous disturbance of public order, resistance and disobedience to a person in authority, disturbance of proceedings, ug direct assault.
Gikasuhan usab siya og paglapas sa Comprehensive Firearms and Ammunition Regulation Act, trespassing, ug paglapas sa mga security regulations sa Senado.
Base sa report sa Southern Police District, nasikop si Oragon sa Senate security department human kini giingong nagpabuto og armas sulod sa Senate building.
Sa pagkakaron, wala pa matino kung unsang klaseha sa armas ang iyang gigamit.
Sa una nang pamahayag ni NBI Director Melvin Matibag, si Oragon usa lamang ka driver alang sa usa ka handler-agent sa NBI nga gi-deploy sa GSIS building sa Pasay.
Ang deployment gihimo human sa letter-request gikan kang GSIS president ug general manager Wick Veloso.