Gipatawag sa National Bureau of Investigation o NBI ang Regional Director sa DPWH Region XI nga si Engineer Juby Blancaver Cordon alang sa paghatag og mga dokumento may kalabotan sa imbestigasyon sa giingong ghost ug substandard flood control projects sa Davao City.
Pinaagi sa subpoena duces tecum, gimandoan si Cordon nga moatubang sa NBI sa Pasay City karong Setyembre 24 ug dad-on ang mga dokumentong may kalabotan sa mga proyekto nga gi-red flag sa ahensya.
Matud ni DPWH Secretary Vince Dizon, lakip sa gilista sa subpoena ang 47 ka proyekto nga giimbestigahan sa NBI.
Ang Genesis88 Construction Incorporated maoy giingong nalambigit sa tanang proyekto nga gilista.
Samtang, giingon sa NBI Director Melvin Matibag nga padayon nilang gisusi ang mga proyekto ug ang mga opisyal ug kontratista nga nalambigit niini.
Matud sa NBI, unom sa 47 ka proyekto ang klarong nakit-an nga kwestiyonable base sa mga dokumentong ilang nasusi.
Wala pa motubag si Cordon sa pagpangayo sa media og pahayag bahin sa subpoena, samtang gisulayan usab sa media nga makuha ang bahin sa Genesis88 Construction ug sa tag-iya niini.