Gipaniguro sa Department of Justice (DOJ) nga mahimong makiangayon ug patas ang pagdumala sa prosekusyon sa mga reklamong gipasaka sa Securities and Exchange Commission (SEC) batok sa pamilyang Villar ug sa kompanya niini.
Matud pa ni Senior Deputy State Prosecutor Peter Ong, ang nangulo sa panel of prosecutors, makalaom ang publiko og usa ka balanse nga imbestigasyon diin walay pagpabor matud pa nga mahitabo.
Gipunting usab ni Ong nga dili maimpluwensyahan ang ilang desisyon sa bisan kinsang gamhanang personalidad, ug andam silang mobarog sa kamatuoran bisan pa man kon adunay masakitan o masuko sa mogawas nga resolusyon.
Subling gipasabot niini nga magpabiling gawasnon ug dili maimpluwensyahan ang ilang panel of prosecutors sa pagdumala sa mga reklamong gipasaka batok sa pamilyang Villar.
Gipasiatab ni Ong nga sukad pa kaniadto, nailhan na kini sa iyang baruganan nga dili magpadiktar sa bisan kinsa mahitungod sa mogawas nga resolusyon sa usa ka kaso.
Matud pa niini, walay bisan kinsa nga nagmando kanila kon unsa ang angayng buhaton, sanglit ginasiguro sa ilang buhatan ang pagka-patas sa matag desisyon nga pagahimuon.