Gipahayag sa legal team ni Vice President Sara Duterte nga ilang gipadayon ang pagpanalipod sa iyang mga katungod sa impeachment proceedings, lakip na ang pagrekord sa ilang mga reservation atol sa oral arguments ug ang posibilidad sa pagdala sa pipila ka isyu ngadto sa Supreme Court.
Matud ni defense spokesman Michael Poa, gihimo nila kini aron masiguro nga mapanalipdan ang interes ug katungod sa bise presidente isip respondent sa impeachment case.
Giingon ni Poa nga ang ilang pagbutang sa maong posisyon sa official record usa ka paagi aron dili mabiyaan ang mga legal nga interes sa ilang kliyente.
Gipasabot usab sa depensa nga wala pa sila nagdesisyon nga awtomatikong dad-on sa Supreme Court ang bisan unsang desisyon sa impeachment court.
Samtang, gipasiugda ni Poa nga ang ilang tumong mao ang pagsiguro nga walay legal nga katungod sa bise presidente nga mapasagdan samtang nagpadayon ang impeachment proceedings.