Gibutyag sa Department of Education (DepEd) Malaybalay ang responsableng paggamit sa artificial intelligence (AI) ug mga teknolohiya sa edukasyon, samtang gitutokan usab ang mga hagit sa paggamit sa internet ug kakulang sa mga classroom.
Matud sa City Schools Division Superintendent nga si Dr. Cherry Mae Limbaco, dili angay nga magsalig lamang sa AI sa pagtudlo tungod kay nagkalahi ang lebel sa pagsabot kabatan, panginahanglan ug learning pace sa matag estudyante.
Kinahanglan una nga ma-conceptualize sa magtutudlo ang instructional material, samtang mahimong gamiton ang AI aron mapalambo pa kini.
Gipasabot usab ni Limbaco, nga kontrolado ang paggamit sa cellphone ug ubang gadgets sulod sa classroom, diin kasagarang gigamit sa mga estudyante ang ICT devices nga gihatag sa eskwelahan.
Samtang, gitutokan usab sa DepEd ang digital responsibility sa mga kabataan tungod sa dali nga pag-access sa impormasyon pinaagi sa internet ug social media.
Lakip sa ilang gihimo ang paghatag og customized netiquette flyer nga adunay pahinumdom nga “think before you post” ug “think before you click.”
Sa laing bahin, giila niini ang kakulang sa classroom sa pipila ka eskwelahan sa Malaybalay, nga maoy hinungdan sa shifting o duha ka schedule sa klase.
Lakip niini ang Bukidnon National High School nga mikabat na sa kapin 11,000 ang estudyante ug ang Bangcud National High School nga nanginahanglan og dugang classroom aron mahatagan og regular nga whole-day classes ang mga estudyante.