Nakakuha og mga pagdayeg gikan sa lokal ug internasyonal nga mga personalidad ang selebrasyon sa Kaamulan Festival 2026 tungod sa lig-on nga pagpreserba sa kultura sa pito ka tribo sa Bukidnon.
Usa sa mga midayeg mao ang kanhi gobernador sa Ilocos nga si Chavit Singson kinsa nagkanayon nga “na-impress” siya sa pagmintinar sa tradisyon sa probinsya. Matud ni Singson, angay kining ipasigarbo sa ubang dapit aron mas modagsa pa ang mga turista sa Bukidnon.
Gawas kang Singson, nabilib usab ang usa ka turista gikan sa Sydney, Australia nga si James Saint. Sa unang higayon niining pagsaksi sa pista, gihulagway ni Saint nga “amazing” ang maong selebrasyon ilabina ang mga pasundayag sa sayaw ug ang panaghiusa sa komunidad. Nanawagan pa kini sa iyang mga katagilungsod sa Australia nga bisitahon ang Kaamulan aron masinati ang talagsaong kabilin ug arte sa mga lumad.
Ang maong mga positibong komento nagpakita lamang nga ang Kaamulan Festival nagpabilin nga epektibo sa pagpadayag sa kultural nga bahandi sa Bukidnon ngadto sa tibuok kalibutan.