Gipasalig ni House Justice Committee member ug Manila Representative Joel Chua nga walay nahitabo nga “grandstanding” sa impeachment proceedings batok kang Vice President Sara Duterte.
Kini misunod sa pagsaway ni kanhing Chief Presidential Legal Counsel Salvador Panelo nga giingong gigamit sa pipila ka miyembro sa komite ang pagdungog alang sa publicity ilabi na nga nagkaduol ang eleksyon sa 2028.
Sumala ni Chua, nga chairman usab sa House Committee on Public Accountability and Good Government, istrikto ang committee chair nga si Rep. Gerville Luistro ug dili ginatugotan ang mga ‘probing question’ nga walay kalabotan sa ebidensya, mao nga walay kahigayunan ang bisan kinsa nga magpasikat lamang.
Dugang pa niini nga taas ang standard sa komite ug ang mga pangutana limitado lamang sa mga ebidensya ug affidavit.
Gihulagway usab niini ang pagbadlong sa komite sa mga mambabalaod nga wala nakahan-ay ang linya sa pagpangutana.
Matud pa ni Chua, walay ginapaboran ang komite ug bisan gikan sa minority o majority. Bukas usab sa publiko ang rekord sa mga pagdungog.
Gipunting usab niini nga disiplinado ang justice panel ug nakapokus lamang sa ilang trabaho, walay “pa-epal” o eksena.