Gipaniguro karon sa Bukidnon Second Electric Cooperative kon BUSECO nga hapsay ug wala’y pagkapalong sa sugang dagitabnon atol sa pagsaulog sa kapaskohan.
Sa pakighinabi sa Bombo Radyo Malaybalay kang Christopher Dulfo, General Manager sa BUSECO, gibutyag niini nga gitapos na sa BUSECO ang tanang maintenance activities sa bulan sa Nobyembre aron masiguro nga dili maapektuhan ang suplay sa sugang dagitabnon sa holiday season.
Matud pa ni Dulfo, andam ang kooperatiba sa pagserbisyo ug pagmintinar sa lig-on nga power distribution, apan giklaro usab niini nga kung adunay pananglit mahitabo nga pagkapalong sa kuryente, kini mahimong tungod sa unscheduled power interruptions sama sa kalit nga kakulangan sa suplay, technical trouble, o dili malikayan nga insidente sa linya nga gawas sa kontrol sa kooperatiba.
Gidugang pa sa General Manager, nga aron mapadali ang pagtubag sa mga reklamo ug report sa publiko, adunay on-standby response teams nga nag-shifting aron 24/7 adunay crew nga moresponde sa tanang emerhensiya.
Giawhag usab niini, ang mga konsumidor nga mopahibalo gilayon sa pinakaduol nga BUSECO office o official hotlines kung makasinati og pagkapalong, aron mas mapaspasan ang pag-ayo sa normal nga serbisyo.