Padayon ang pagtaas sa kaso sa HIV sa Bukidnon ug sa tibuok Northern Mindanao.
Matud ni Joseph Marben Gealon, HIV provincial coordinator, nga mukabat na sa kapin kon kulang 800 na ang kaso sa HIV nga natala sa lalawigan sa Bukidnon.
Samtang sa bulan sa Enero hangtod sa bulan sa Pebrero, adunay natala nga 30 nga kaso sa HIV sa probinsiya diin base sa datos, natala ang Bukidnon sa ikaduha sa pnakadaghang kaso sa HIV sa Rehiyon 10.
Gibutyag ni Gealon, nga sagara sa mga apektado mao ang mga batan-on nga anaa sa pangedaron nga 15 hangtod 25 anyos.
Apan ning kasamatangan, nisubog kini sa pangedaron nga 25 paingun 34.
Dugang pa niini, nga aron masulbad kini, naglusad sila og usa ka Comprehensive HIV Ordinance uban ang tabang sa ubang ahensya, nga nagtumong sa pagpakunhod sa stigma, pagprotekta sa katungod sa mga PLHIV kon People Living with HIV, ug pagpalig-on sa community-based education.
Giklaro usab sa coordinator, nga libre usab ang HIV testing ug tambal sa mga treatment hub sa Valencia, Malaybalay, ug Maramag.
Dugang pa ni Gealon nga bisan pa man niini, nagpabilin nga hagit ang kakulang sa sex education ug ang kahadlok sa diskriminasyon, busa importante nga magpadayon ang edukasyon, suporta sa mga LGU, ug ang pagpraktis sa luwas nga pakighilawas aron mapugngan ang pagkaylap sa HIV.