Nagtuo si Atty. Oscar “Oca” Moreno, usa ka legal expert ug kanhi prosecutor sa impeachment ni Former Pres. Joseph Erap Estrada, nga posibleng makuha ang gikinahanglang 1/3 nga boto sa House of Representatives aron ma-impeach si Vice President Sara Duterte.
Gipasabot nga ang kasamtangang politikanhong sitwasyon nagpakita nga adunay igong suporta, ilabi na kon itandi sa gidaghanon sa mga mambabalaod nga mipirma sa ubang mga inisyatiba sa miaging tuig.
Matud ni Moreno, ang pagpahibalo ni VP Sara sa iyang plano nga modagan isip presidente mahimong usa ka estratehiya aron mapalig-on ang iyang suporta sa Mindanao ug uban pang dapit diin kini popular apan aduna gihapoy puruhan nga makab-ot ang tinguha nga boto.
Gipasiugda usab niini nga ang pagkapopular sa Bise Presidente sa nagkalain-laing bahin sa nasud maoy usa ka dakong hagit alang sa bisan kinsang buot mopasaka og impeachment case batok niini.
Taliwala sa maong posibilidad, bisan pa og makuha ang 1/3 nga boto sa House of Representatives, gidugang niini, nga kon karon nga politikanhong sitwasyon ang pagabasehan, maglisod ang mga pabor sa impeachment ni Bise Presidente Sara Duterte sa pagkuha og 16 ka boto sa Senado. Bisan pa man kon adunay 15 ka mga senador sa mayorya, aduna gihapoy mga kandidato o mga senador gikan sa maong pundok nga posibleng mobotar pabor sa Bise Presidente.
Gipahinumdom niini ang usa ka resolusyon nga gipasar sa Senado kaniadto diin daghan usab amatud pa ang mipirma. Kini nagpakita lamang sa komplikado nga dynamics sa Senado kon maghisgot na og impeachment proceedings.