Usa ka 46-anyos nga lalaki ang nakabsan sa kinabuhi samtang angol apan anaa na sa luwas nga kahimtang ang iyang 43-anyos nga asawa human sila gipusil kaganihang alas 4:20 sa kaadlawon, Abril 11, 2026, sa Purok 8, Barangay Bizmarts, Don Carlos, Bukidnon.
Base sa inisyal nga imbestigasyon sa Don Carlos Municipal Police Station, nasayran nga nangandam sa trabaho ang magtiayon dihang ilang namatikdan ang pagduol sa usa ka wala mailhing lalaki sa ilang puluy-anan. Sa walay klarong hinungdan, kalit lang mipabuto ang suspek og tulo ka higayon sa dili pa kini daling misibat sakay sa usa ka motorsiklo.
Ang bana nakaangkon og samad pinusilan sa iyang tuo nga paa nga maoy hinungdan sa iyang kamatayon, diin gideklara kining dead on arrival sa mga doktor. Samtang ang asawa, kinsa nakaangkon og mga samad sa iyang duha ka paa ug wala nga bahin sa hawak, padayon pa nga gitambalan apan anaa na sa stable nga kondisyon.
Matud sa kapulisan, wala na gipahigayon ang SOCO processing tungod kay nakonsidera na nga contaminated o nahugawan na ang crime scene sa mga tawo nga unang misulod sa lugar sa wala pa moabot ang mga responder. Bisan pa man niini, narekober sa mga otoridad ang duha ka basiyo sa bala nga ipadala sa Provincial Forensic Unit alang sa ballistic examination.
Sa pagkakaron, ang patayng lawas sa biktima anaa na sa kustodiya sa Adlawan Funeral Homes. Padayon pa ang gihimong lawom nga imbestigasyon sa mga otoridad aron mailhan ang suspek ug masuta ang tinuod nga motibo sa maong madugoong krimen.