Usa ka gamay nga asteroid nga ginganlan og 2026 QQ8 ang temporaryong naglibot sa Yuta human madani sa grabidad niini, hinungdan nga giila kini sa mga astronomo isip minimoon o temporaryong ikaduhang bulan sa atong planeta.
Mokabat lamang sa duha ka metros ang diyametro sa maong asteroid ug unang namatikdan sa mga astronomo niadtong Agosto sa wala pa opisyal nga gikumpirma ang presensya niini.
Gilauman nga magpabilin kini sa palibot sa Yuta hangtod Enero 2027 sa dili pa makalingkawas sa grabidad sa planeta.
Gipatin-aw sa mga eksperto nga dili kini hulga sa Yuta tungod sa gamay kaayong gidak-on niini.
Talagsaon usab kini nga panghitabo nga nagpakita kung giunsa temporaryong madani sa grabidad sa Yuta ang gagmayng mga bato nga naglatagaw sa kawanangan.

