Gideklara nga guilty sa Metropolitan Trial Court Branch 2 sa Bacoor City ang aktor nga si Archie Alemania kalabot sa kasong Acts of Lasciviousness nga gisang-at kaniya sa aktres nga si Rita Daniela.
Base sa desisyon sa korte, napamatud-an ang sala sa aktor human kini mangayo og pasaylo sa aktres sa insidente nga nahitabo sulod sa awto nga giisip sa korte nga boluntaryong pag-angkon sa kalapasan.
Ubos sa Article 336 sa Revised Penal Code, silotan si Alemania og pagkapriso sulod sa usa ka bulan ug usa ka adlaw hangtod usa ka tuig ug usa ka adlaw, ug obligadong mobayad og ₱20,000 civil indemnity ug ₱20,000 moral damages.
Mitambong ang aktor sa pagbasa sa desisyon apan wala siya dakpa gumikan adunay piyansa, ug gihatagan pa kini og 15 ka adlaw aron moapela o mopasa og Motion for Reconsideration.
Samtang, si Rita Daniela mitambong usab sa korte ug naluha sa kalipay human madungog ang hukom.