Gipunting sa usa ka eksperto sa balaod nga ang papel sa Anti-Money Laundering Council (AMLC) sa kasamtangang impeachment proceedings batok kang Vice President Sara Duterte limitado lamang sa pagpresentar og “suspicious transaction reports” ug dili pa kini ang pinal nga ebidensya nga magamit sa Senado kung mosaka na ang kaso ngadto sa impeachment trial.
Matud ni Atty. Oscar S. Moreno, ang AMLC nagreport lamang sa mga transaksyon nga posibleng konektado sa gitawag nga “predicate crimes,” o mga krimen nga kasagarang gihimo sa mga opisyal sa gobyerno may kalabotan sa ilang katungdanan.
Gipasiugda niya nga ang mga diskusyon sa House Committee on Justice kabahin sa impeachment ni VP Sara Duterte nagbase pa lamang sa preliminary findings ug dili pa sa final nga ebidensya.
Gipasabot usab niini nga ang bank deposits nagpabilin nga protektado ubos sa confidentiality laws, gawas lamang sa pipila ka eksepsyon sama sa pagtugot sa depositor o kung mosulod na sa pormal nga impeachment proceedings nga giatubang sa Senado.
Dugang pa niini, kung mosaka na sa Senate impeachment court ang kaso batok kang VP Sara Duterte, didto pa lamang mahimong ipagawas pinaagi sa subpoena ang aktuwal nga bank records ug uban pang dokumento nga mahimong lig-on nga ebidensya sa paghusay sa kaso.
Gipunting usab sa abogado nga ang Income Tax Returns (ITR) nagpabilin nga confidential ug dili mahimong ablihan gawas kung naa na sa husto ug pormal nga proseso sama sa impeachment trial.