Pormal nang nitubag si Senador Alan Peter Cayetano sa reklamong obstruction of justice nga gipasaka batok kaniya kalabot sa kontrobersiyal nga pag-ikyas ni Senador Ronald “Bato” Dela Rosa gikan sa compound sa Senado niadtong Mayo 14.
Nadawat sa Office of the Ombudsman niadtong Miyerkules, Hulyo 15, ang counter-affidavit ni Cayetano isip tubag sa gipahigayon nga preliminary investigation. Gipasaka ang maong reklamo sa koalisyon sa civil society nga Tindig Pilipinas niadtong Hunyo 3.
Giakusahan sa maong grupo si Cayetano—nga kaniadto maoy Senate President—lakip sila si Senador Robin Padilla ug ang gitangtang nga Acting Senate Sergeant-at-Arms nga si Mao Aplasca, sa paggamit sa ilang katungdanan aron babagan ang mga ahente sa NBI nga moserbi unta og warrant sa International Criminal Court (ICC) batok kang Dela Rosa. Sa pagkakaron, nagpaabot pa ang Ombudsman sa tubag nila ni Padilla ug Aplasca kinsa wala pa makasumite sa ilang counter-affidavit.