Opisyal na nga nakasulod sa Top 40 sa Women’s Tennis Association (WTA) ang Pinay tennis star nga si Alex Eala, sa wala pa ang iyang opening-round match sa WTA 1000 Qatar Open didto sa Doha.
Kini nga garbo naghimo kaniya nga labing taas og ranggo nga Filipina tennis player sa kasaysayan. Nahitabo kini human sa iyang malamposon nga kampanya sa Abu Dhabi Open diin nakaabot siya sa quarterfinals sa singles ug semifinals sa doubles.
Apan sa wala pa niya maabot ang global stage, nagsugod si Eala sa yano nga paagi. Sa preschool pa lang siya, una na siyang migunit og raketa didto sa Valle Verde Country Club sa Pasig City, diin ang pagdula og tennis usa lamang ka kalingawan sa ilang pamilya.
Sa batan-on pa nga edad, gipakita na niya ang iyang talagsaong abilidad ug dedikasyon sa dula.
Sa dihang nag-edad na siya og 13, nibalhin siya sa Mallorca, Spain aron mag-training sa Rafa Nadal Academy. Kini nga lakang naghatag kaniya og mas dako nga oportunidad nga makigsangka sa mga international junior players. Dinhi siya mas nabaid ug nahimong junior champion sa nagkalain-laing torneo, lakip na ang Grand Slam junior doubles titles.
Gikan sa pagkahimong “promising junior,” nahimong pro si Eala niadtong 2020, ug hinay-hinay nga nisaka ang iyang ranggo bisan pa man sa mga hagit batok sa mas lig-on nga mga kaatbang sa WTA circuit.
Sa iyang pagsulod sa Top 40 karong Pebrero 2026, gipamatud-an niya nga ang damgo nga nagsugod sa usa ka yano nga tennis court sa Pasig mahimong moresulta sa usa ka kalibutanong kalamposan.