Mitaliwan na ang beteranong aktor nga si Pepito Rodriguez sa edad nga 83, sumala sa kumpirmasyon sa pamilya niini.
Matud sa impormasyon, namatay kini sayong buntag sa Pebrero 26, 2026 tungod sa komplikasyon sa pulmonya samtang nagpa-atiman sa balay tambalanan.
Nailhan si Rodriguez isip usa sa mga bantugang bituon sa Sampaguita Pictures sa dekada 1960 ug kabahin sa “Stars ’66” nga grupo nga naglangkob sa mga haligi sa golden age sa pelikulang Pilipino.
Lakip sa mga nahimong obra niini ang Siyam na Langit, Abaruray Abarinding, Mga Batang Iskuwater, ug Danny Boy, nga nagpalig-on sa dungog isip respetadong aktor sa industriya.
Nakadaog usab kini og Best Supporting Actor sa Manila Film Festival kaniadtong 1969, ug sa 2024 gihatagan kini og dakong pasidungog sa Filipino Academy of Movie Arts and Sciences isip Iconic Movie Actor of Philippine Cinema, timaan sa malungtarong kontribusyon sa pelikulang Pilipino.