Gipahibalo sa International Criminal Court (ICC) kagahapong adlawa ang proseso sa upat (4) ka adlaw nga confirmation of charges hearing kalabot sa kaso nga crimes against humanity batok kang kanhe Presidente Rodrigo Duterte tungod sa iyang kontrobersyal nga kampanya kontra druga.
Matud pa ni ICC spokesperson Oriane Maillet, magsugod ang hearing karong Pebrero 23. Giklaro niini nga dili kini trial, kondili usa lang ka pre-trial hearing.
Una nang gipahayag sa ICC nga dili tugotan ang trial kon wala ang suspetsado kon makumpirma ang mga kaso. Giuyonan sa Pre-Trial Chamber I ang hangyo ni Duterte nga dili na Mutambong sa confirmation of charges hearing.
Matud ni Maillet, sa upat ka adlaw nga hearing, paminawon sa Pre-Trial Chamber I ang mga argumento sa prosecution, defense ug ang mga legal representative sa mga biktima.
Human niini, dunay 60 ka adlaw ang mga huwes sa pagsusi sa ebidensya ug paghimo og desisyon kon mopaingon ba sa trial ang kaso.