Nakatakdang moabot si US President Donald Trump sa Davos, Switzerland alang sa World Economic Forum (WEF) aron makigtagbo sa nagkadaiyang mga lider sa kalibutan. Ang nag-unang agenda sa presidente mao ang iyang plano sa pagpalit o pag-angkon sa Greenland, nga iyang gihulagway nga “gikinahanglan kaayo” alang sa seguridad sa America.
Sa wala pa ang panagtigom, gipahayag ni Trump nga nakig-istorya na siya sa NATO Secretary-General ug gipaniguro nga “walay atrasay” ang maong plano. Nagbahad usab ang presidente og dugang taripa o buhis batok sa mga nasod sa Europe nga mobabag sa iyang tinguha.
Bisan pa niini, daghang mga lider sa Europe ang mipadayag sa ilang pagsupak, nga nag-ingon nga angayng respetuhon ang soberanya sa Denmark ug Greenland. Gipaabot nga ang pakigpulong ni Trump karong adlawa magdala og dakong tensyon sa relasyon sa US ug sa ubang mga gamhanang nasod.