Gikumpirma sa Department of Public Works and Highways (DPWH) nga 27 ka construction firm nga giila sa Commission on Elections (Comelec) nga campaign donors sa pipila ka kandidato niadtong eleksyon tuig 2022 adunay mga kontrata sa gobyerno. Base sa sertipikasyon nga gipagawas sa DPWH niadtong Oktubre 14, pipila sa mga kompanya nakadawat na og proyekto gikan pa sa 2004 hangtod 2025.
Lakip niini ang Centerways Construction and Development Inc. nga gipangulohan ni Lawrence Lubiano, nga mitug-an nga naghatag og donasyon sa kampanya ni Senador Chiz Escudero. Samtang sa laing sertipikasyon, 26 ka kompanya ang gikumpirmang walay kasamtangang kontrata sa DPWH, lakip ang New San Jose Builders nga giingong donor sa kampanya ni Senador Joel Villanueva.Â
Gisusi karon sa Comelec ang mga kompanya nga nalambigit sa gituhuang ilegal nga donasyon ubos sa Omnibus Election Code. Gikatakdang padalhan og show cause order ang mga kontraktor ug kandidato aron ipasabot ang ilang kontribusyon.