Gikumpirma ni lead prosecutor ug Batangas Rep. Jervi Luistro nga pinal na ang desisyon sa prosecution nga i-withdraw si dating Senador Antonio Trillanes isip usa sa ilang mga testigo sa impeachment trial ni Vice President Sara Duterte.
Matud ni Luistro, dugay nang gihisgutan sa prosecution kung ipresentar ba o dili si Trillanes isip testigo, apan wala siya maghatag og dugang detalye ug giingon nga ang kanhing senador mismo ang mopatin-aw niini sa iyang press conference.
Pormal nang giatras sa prosecution ang ngalan ni Trillanes sa ilang listahan sa mga testigo.
Matud sa mga abogado, dili kini makaapekto sa pagpalambo sa Article nga ilang gipasaka batok sa bise presidente.
Samtang, gisalikway ni Rep. Zia Alonto Adiong ang obserbasyon nga napakyas ang prosecution sa ilang pagdumala sa mga testigo, lakip na ang desisyon nga dili na ipatawag si Trillanes.
Sa laing bahin gidepensahan usab ni Rep. Terry Ridon ang prosecution batok sa mga alegasyon nga adunay pagpakyut sa ilang mga testigo, ug gipasiugda nga nagpabilin silang nakapokus sa impeachment case.