Gihugtan sa Department of Agriculture (DA) ang pagbantay batok sa mga pagmanipula sa presyo sa bugas pinaagi sa hugot nga koordinasyon uban sa rice importers, retailers ug stakeholders.
Kini subay sa pagsugod sa paghunong rice importation sugod niadtong unang adlaw sa Septyembre.
Matud ni DA spokesperson Asec. Arnel De Mesa, nagpadayon ang ilang pag-inspeksyon sa mga merkado uban sa Department of Trade and Industry (DTI), Philippine National Police (PNP) ug mga lokal nga kagamhanan aron masiguro ang husto nga pagpapatuman sa suspensyon sa rice importation.
Namatikdan ang pagsaka sa presyo sa imported nga bugas apan wala’y paglihok sa presyo sa lokal nga bugas.
Giklaro usab sa DA nga aduna pay igo nga suplay sa bugas base sa imbentaryo sa National Food Authority (NFA), nga adunay gibanabana nga 11 milyon metric tons nga anihaon sa mosunod nga mga semana.